Cart

Feugiat nulla facilisis at vero eros et curt accumsan et iusto odio dignissim qui blandit praesent luptatum zzril.

Related Posts

Cart

ტელეფონი
ყოველდღე: 24/7 სამუშაო საათები
ელ. ფოსტა
სიმსუქნე

სიმსუქნე

სიმსუქნე კომპლექსური დაავადებაა, რომელიც ხასიათდება სხეულში დიდი რაოდენობით ცხიმის დაგროვებით. სიმსუქნე არ განიხილება მხოლოდ კოსმეტიკურ ჭრილში. იგი წარმოადგენს სერიოზულ სამედიცინო პრობლემას, რომელიც ზრდის სხვა დაავადებებისა და ჯანმრთელობის პრობლემების განვითარების რისკებს. სიმსუქნესთან ასოცირებულია: გულის დაავადებები, დიაბეტი, არტერიული ჰიპერტენზია და ზოგიერთი სახის სიმსივნური დაავადება.

მრავალი მიზეზია გამოვლენილი, თუ რატომ უჭირს ზოგ ადამიანს სიმსუქნის თავიდან აცილება. ჩვეულებრივ, სიმსუქნე წარმოადგენს გარემო და გენეტიკური ფაქტორების კომბინირებული მოქმედების შედეგს, სადაც კრიტიკულ როლს თამაშობს პერსონალური კვებითი ნირი და ფიზიკური აქტივობის ინტენსივობა.

აღსანიშნავი დადებითი ფაქტია, რომ წონის უმნიშვნელო კლებაც კი მნიშვნელოვნად ამცირებს სიმსუქნესთან ასოცირებული დაავადებების განვითარების რისკებს. კვებითი რაციონის ცვლილება, ფიზიკური აქტივობის გაზრდა და ქცევითი ცვლილებები დადებით გავლენას ახდენს ჯანმრთელობის ზოგად მდგომარეობაზე და აადვილებენ წონის კლებას. მედიკამენტები და წონის დასაკლებად მოწოდებული პროცედურები სიმსუქნის მკურნალობაში მხოლოდ დამატებით როლს თამაშობენ.

სიმპტომები

სიმსუქნის დიაგნოზი ისმება მაშინ, როდესაც სხეულის მასის ინდექსი არის (BMI) არის 30 ან მეტი. სხეულის მასის ინდექსის გამოსათვლელად წონა (კგ) უნდა გაყოთ სიმაღლის (მ) კვადრატზე. პირობითად, თუ თქვენი სიმაღელა 180 სმ, ხოლო წონა 70 კგ, თქვენი სხეულის მასის ინდექსი იქნება:  70/ 1.82 = 70/3.24 = 21.6.

BMI                                               წონის სტატუსი

  • 18.5-ზე ნაკლები              წონის დეფიციტი
  • 18.5- 24.9                           ნორმალური
  • 25.0- 29.9                           ჭარბი წონა
  • 30.0 და მეტი                    სიმსუქნე

ადამიანთა უმრავლესობაში, სხეულის მასის ინდექსი ინფორმაციას იძლევა სხეულის ცხიმის რაოდენობაზე, თუმცა იგი პირდაპირი გზით არ ზომავს ცხიმის რაოდენობას, შესაბამისად, ზოგ ადამიანს, მაგალითად დიდი კუნთური მასის მქონე ათლეტებს, შეიძლება, სხეულის მასის ინდექსი ჰქონდეთ იმდენად მაღალი, რომ შედიოდნენ სიმსუქნის კატეგორიაში იმის მიუხედვად, რომ მათ არ აქვთ ზედმეტი ცხიმი.

მიზეზები

იმის მიუხედავად, რომ სხეულის წონაზე მოქმედებს როგორც გენეტიკური, ასევე ქცევითი, მეტაბოლური და ჰორმონული ფაქტორები, სიმსუქნე ვითარდება  მაშინ, როდესაც ადამიანი იღებს იმაზე მეტ კალორიას, ვიდრე წვავს ფიზიკური ან სხვა ყოველდღიური აქტივობის დროს.  ორგანიზმი დაუხარჯავ კალორიებს იმარაგებს ცხიმის სახით.

სიმსუქნის პრობლემა განსაკუთრებით დგას განვითარებული ქვეყნების მოსახლეობაში. მაგალითად, ამერიკელების კვებითი რაციონი ძალიან კალორიულია, რისი მიზეზიცაა სწრაფი კვების ობიექტებში ე.წ: ფასთ ფუდის“ მოხმარება და მაღალკალორიული სასმელების მიღება. სიმსუქნის მქონე პირები იღებენ ძალიან დიდი რაოდენობით საკვებს იქამდე, სანამ არ იგრძნობენ დანაყრებას, შივდებათ დანაყრებიდან მოკლე დროში და/ან ჭამენ ძალიან ბევრს სტრესისა და შფოთვის გამო.

რისკ-ფაქტორები

სიმსუქნე წარმოადგენს გამომწვევი მიზეზებისა და კონტრიბუტორი ფაქტორების კომბინირებული მოქმედების შედეგს.

ოჯახური მემკვიდრეობა და გავლენები

მშობლებისგან მიღებულმა გენებმა, შესაძლოა, გავლენა მოახდინონ იმაზე, თუ რა რაოდენობის ცხიმს დაიმარაგებს თქვენი ორგანიზმი და სად მოხდება ამ დამარაგებული ცხიმების განაწილება. გენეტიკა თამაშობს მნიშვნელოვან როლს იმაშიც, თუ რამდენად კარგად შეუძლია თქვენს ორგანიზმს მიღებული საკვების ენერგიად გარდაქმნა, როგორ ახდენს თქვენი ორგანიზმი მადის რეგულირებასა და როგორ წვავს თქვენი ორგანიზმი კალორიებს ფიზიკური აქტივობის დროს.

სიმსუქნეს ახასიათებს ოჯახური გავრცელება. ამის მიზეზი კი მხოლოდ გენეტიკა არ არის (თუმცა მისი როლი კრიტიკულია), როგორც წესი, ოჯახში ყველა წევრი იზიარებს ერთსა და იმავე საკვებ რაციონს და გააჩნიათ მსგავსი კვების ნირი.

ცხოვრების სტილი
  • არაჯანსაღი საკვები რაციონი. საკვები რაციონს, რომელიც მდიდარია კალორიებით, შეიცავს მცირე რაოდენობით ან საერთოდ არ შეიცავს ხილსა და ბოსტნეულს, მდიდარია ფასთფუდითა და მაღალკალორიული სასმელებით, მნიშვნელოვანი წვლილი შეაქვს სიმსუქნის განვითარებაში.
  • თხევადი კალორიები. ძალიან დიდი რაოდენობით კალორიის მიღება შესაძლებელი დანაყრების გრძნობის გარეშე, განსაკუთრებით, ალკოჰოლის გზით. სიმსუქნის განვითარებაში მნიშვნელოვანი წვლილი მიუძღვით სხვა მაღალკალორიულ სასმელებსაც, მაგალითად შაქრის შემცველ უალკოჰოლო გაზიან სასმელებს.
  • მცირე ფიზიკური აქტივობა. თუ თქვენი ცხოვრების წესი მჯდომარე და უმოძრაოა, უფრო მარტივადაა შესაძლებელი, რომ მიღებულთან შედარებით ნაკლები კალორია დახარჯოთ. მუდმივად კომპიუტერთან, ტელეფონთან ან ტაბლეტთან ჯდომა უმოძრაო ცხოვრების წესად განიხილება. ეკრანთან გატარებული საათების რაოდენობა მნიშვნელოვნადაა ასოცირებული წონის მატებასთან.
გარკვეული დაავადებები და მედიკამენტები

ზოგ შემთხვევაში, სიმსუქნე შეიძლება იყოს კონკრეტულ პრობლემასთან დაკავშირებული, მაგალითად, პრადერ-ვილის სინდრომი, კუშინგის სინდრომი და სხვა მდგომარეობებისთვის დამახასიათებელია სხეულზე ცხიმის რაოდენობისა და მისი გადანაწილების თავისებურებები. ამასთან ერთად, მაგალითად, ართრიტების დროს სიმსუქნის მიზეზი შეიძლება იყოს ფიზიკური აქტივობის შეზღუდვა.

ზოგიერთ წამალს, შუძლია გავლენა მოახდინოს სხეულის წონაზე, განსაკუთრებით იმ შემთხვევაში, თუ მათი ეს ეფექტი არ კომპენსირდება ფიზიკური აქტივობისა და საკვები რაციონის ცვლილებით. ასეთი მედიკამენტებია, მაგალითად: ანტიდეპრესანტები, ანტიკონვულსანტები (გულყრის საწინააღმდეგო), დიაბეტის დროს გამოყენებადი, ანტიფსიქოზური, სტეროიდული და ბეტა ბლოკერული მედიკამენტები.

სოციალური და ეკონომიკური პრობლემები

სოციალური და ეკონომიკური ფაქტორები მჭიდროდაა დაკავშირებული სიმსუქნესთან. რთულია სიმსუქნის თავიდან აცილება ისეთ გარემოში, სადაც არ არის უსაფრთხო ფიზიკური აქტივობა, სეირნობა და ა.შ. საკვების მომზადების არაჯანსაღი წესი და ჯანსაღ პროდუქტებზე ხელმიუწვდომლობა ასევე, მნიშვნელოვანი ფაქტორებია. გარდა ეკონომიკურისა, მნიშვნელოვანია სოციალური ფაქტორებიც. კერძოდ, თუ თქვენ დიდ დროს ატარებთ მსუქანი ადამიანების გარემოცვაში, სამეგობროში, ოჯახში, უფრო მეტად ხართ მიდრეკილი, რომ თქვენც შეგექმნებათ ანალოგიური პრობლემა.

ასაკი

სიმსუქნე ნებისმიერ ასაკში შეიძლება განვითარდეს, მათ შორის, მცირე ასაკის ბავშვებშიც. თუმცა, ასაკის მატებასთან ერთად, ორგანიზმში მიმდინარეობს ჰორმონული ცვლილებები, იკლებს ფიზიკური აქტივობა, შესაბამისად, იზრდება სიმსუქნის განვითარების რისკიც. ამასთან ერთად, ასაკის მატებას თან ახლავს კუნთოვანი მასის შემცირება (გარკვეული ასაკის შემდეგ). შემცირებული კუნთოვანი მასა ნიშნავს შემცირებულ მეტაბოლიზმის ინტენსივობას. აღნიშნული ცვლილებებიდან გამომდინარე, ორგანიზმის მოთხოვნილება კალორიებზე ნაკლებია, შესაბამისად, უფრო რთულია წონის დაქვეითება. თუ ასაკის მატებას თან არ ახლავს მიღებული საკვების კონტროლი და ფიზიკური აქტივობის, ასე თუ ისე, ზრდა, წონის მომატება გარდაუვალია.

სხვა ფაქტორები
  • ორსულობა. წონის მომატება ძალიან ხშირია ორსულობის დროს. ზოგჯერ კი ძალიან რთულია ამ მომატებული წონის დაკლება მშობიარობის შემდეგ. წონის აღნიშნულმა მატებამ, შესაძლოა, გავლენა იქონიოს შემდგომში სიმსუქნის განვითარებაზე. ორსულობის დროს მომატებული წონის დაქვეითების საუკეთესო გზა ახალშობილის ძუძუთი კვებაა.
  • მოწევაზე თავის დანებება. მოწევაზე თავის დანებება, ხშირად, ასოცირებულია წონის მომატებასთან. ზოგჯერ კი, წონისმატება იმდენად ინტენსიურია, რომ შეიძლება სიმსუქნედაც კი დაკვალიფიცირდეს. როგორც წესი, ეს ხდება მაშინ, როდესაც მოწევაზე დამოკიდებულებასა და ჩვევას ადამიანები ანაცვლებენ საკვების მიღებით. მიუხედავად ამისა, მოწევაზე თავის დანებება, ხანგრძლივ პერსპექტივაში, მნიშვნელოვნად ამცირებს სხვა დაავადებების განვითარების რისკს, აქვს მეტი დადებითი მხარე, ვიდრე უარყოფითი და, შესაბამისად, გადაწონის იმ რისკებს, რომელიც მას ახლავს თან.
  • ძილის ნაკლებობა. არასაკმრისი ძილი ან, პირიქით, ხანგძლივი ძილი იწვევს ჰორმონული ცვლილებების განვითარებას ორგანიზმში და ზრდის მადას. ასევე ამ დროს შეიძლება განვითარდეს ნახშირწყლებით მდიდარი საკვების მიმართ განსაკუთრებული მოთხოვნილება, რაც მნიშვნელოვნად ზრდის წონის მატებისა და სიმსუქნის განვითარების რისკს.
  • სტრესი. მრავალი გარემო ფაქტორი, რომელსაც შეუძლია თქვენი ხასიათისა და გუნება-განწყობის ცვლილება, შეუძლია გავლენა მოახდინოს სიმსუქნის განვითარებაზეც. სტრესულ სიტუაციებში, როგორც წესი, ადამიანებს უჩნდებათ მაღალკალორიული საკვების მიღების სურვილი.
  • მიკრობიომი. ნაწლავის მიკრობული ფლორა იმყოფება თქვენი კვებითი რაციონის გავლენის ქვეშ. მათ შეუძლიათ გამოიწვიონ წონის მომატება და წონის დაკლების გართულება.
  • წონის კლების მცდელობები. წონის კლების მცდელობებს, რომლებსაც მოსდევს წონაში სწრაფი მატება, შეუძლიათ გამოიწვიონ წონაში კიდევ უფრო ინტენსიური მომატება. ეს ფენომენი ცნობილია იო-იო დიეტინგი სახელწოდებით. ამ დროს ნელდება მეტაბოლიზმი.

იმ შემთხვევაშიც კი, თუ თქვენ გაქვთ ჩამოთვლილთაგან ერთი ან მეტი რისკ- ფაქტორი, ეს არ ნიშნავს, რომ უალტერნატივოდ განგივითარდებათ სიმსუქნე. მრავალი რისკ-ფაქტორი შეგიძლიათ შეცვალოთ და მოხსნათ ჯანსაღი საკვები რაციონის, ფიზიკური აქტივობისა და ქცევითი ცვლილებების დახმარებით.

გართულებები

სიმსუქნის მქონე პირები მიდრეკილები არიან რიგი სერიოზული დაავადების განვითარებისადმი, რაც მოიცავს:

  • გულის დაავადება და ინსულტი. სიმსუქნეს, როგორც წესი, თან ახლავს არტერიული ჰიპერტენზია და ქოლესტეროლის მომატებული დონე სისხლში. აღნიშნული ორი ფაქტორი კი ზრდის გულის დაავადებებისა და ინსულტის განვითარების რისკებს.
  • ტიპი 2 დიაბეტი. სიმსუქნე გავლენას ახდენს უჯრედების ინსულინისადმი მგრძნობელობაზე. ვითარდება რეზისტენტობა, შესაბამისად, გლუკოზის ათვისება ირღვევა იმ ქსოვილების მიერ, რომლებიც ამისთვის ინსულინს საჭიროებენ.
  • ზოგიერთი სიმსივნე. სიმსუქნე ზრდის საშვილოსნოს, საშვილოსნოს ყელის, ენდომეტრიუმის საკვერცხის, ძუძუს, კოლინჯის, სწორი ნაწლავის, საყლაპავის, ღვიძლის, ნაღვლის ბუშტის, პანკრეასის, თირკმლისა და პროსტატის კიბოს განვითარების რისკს.
  • მონელების პრობლემები. სიმსუქნის დროს იზრდება გასტრო-ეზოფაგური რეფლუქის, ნაღვლის ბუშტისა და ღვიძლის დაავადებების განვითარების რისკი.
  • გინეკოლოგიური და სექსუალური პრობლემები. სიმსუქნეს შეუძლია უნაყოფობისა და არარეგულარული ციკლის გამოწვევა ქალებში. ასევე, მნიშვნელოვანია მისი როლი ერექციული დისფუნქციის განვითარებაში.
  • ძილის აპნოე. სიმსუქნის მქონე პირები უფრო მიდრეკილები არიან ძილის აპნოეს განვითარებისადმი. აღნიშნული წარმოადგენს პოტენციურად სახიფათო მდგომარეობას, რომლის დროსაც ადგილი აქვს სუნთქვის განმეორებად შეჩერებებს ძილის პროცესში.
  • ოსტეოართრიტი. სიმსუქნის დროს იზრდება სახსრებსა და ძვლებზე მოქმედი ძალის ინტენსივობა და დატვრითვა. იმის გათვალისწინებით, რომ სიმსუქნეს ასევე ორგანიზმი მოჰყავს ანთებისადმი მიდრეკილ მდგომარეობაში, ამ ორი ფაქტორის თანაარსებობის დროს, მნიშვნელოვნად იზრდება ოსტეოართრიტის განვითარების რისკი.
  • კოვიდ-19-ის მძიმე სიმპტომები. ახალი კორონავირუსით ინფიცირების შემთხვევაში, სიმსუქნე მნიშვნელოვან გავლენას ახდენს დაავადების- კოვიდ-19-ის მიმდინარეობასა და გამოსავალზე. სიმსუქნის მქონე პირებში დაავადება, როგორც წესი, მიმდინარეობს უფრო მძიმედ და საჭირო ხდება ინტენსიური თერაპიის განყოფილებაში პაციენტის მოთავსება.
ცხოვრების ხარისხი

სიმსუქნე მნიშვნელოვნად ამცირებს ცხოვრების ხარისხს. ასეთ დროს, ადამიანებს აღარ აქვთ ისეთი აქტივობების განხორციელების უნარი, როგორსაც ადრე ახორციელებდნენ. ერიდებიან ფართო შეკრებებს. სიმსუქნის მქონე ადამიანები, სამწუხაროდ, ხშირად ხდებიან დისკრიმინაციისა და ბულინგის მსხვერპლნი.

წონასთან დაკავშირებული სხვა პრობლემები, რომლებიც გავლენას ახდენენ ცხოვრების ხარისხზე, მოიცავს:

  • დეპრესია
  • უმოქმედობა
  • სექსუალური პრობლემები
  • სირცხვილისა და დანაშაულის გრძნობა
  • სოციალური იზოლაცია
  • შემცირებული პროდუქტიულობა სამსახურში.
პრევენცია

ნებისმიერ შემთხვევაში, გაქვთ სიმსუქნე, ჭარბი წონა თუ თქვენი წონა არის ნორმალური, შემდგომი ნაბიჯების გამოყენებით, შეგიძლიათ, თავიდან აირიდოთ წონაში მატება, სიმსუქნე და ჯანმრთელობის სხვა ბევრი პრობლემა. გასაკვირი არაა, რომ ღონისძიებები რომლებიც გამოიყენება წონის მატების თავის ასარიდებლად, საერთოა წონის დაკლების სურვილის შემთხვევაში. ეს ღონისძიებებია:

  • რეგულარული ფიზიკური აქტივობა. წონის მატების პრევენციისთვის, საჭიროა 150-300 წუთის განმავლობაში საშუალო ინტენსივობის ფიზიკური აქტივობა კვირის განმავლობაში. საშუალო ინტენსივობის ფიზიკური აქტივობა მოიცავს სწრაფ სიარულსა და ცურვას.
  • მიჰყევით ჯანსაღ კვებით გეგმას. ფოკუსირება მოახდინეთ მცირეკალორიულ, ნუტრიენიტებით მდიდარ ისეთ საკვებზე, როგორებიცაა: ხილი, ბოსტნეული და მარცვლეული. მოერიდეთ ნაჯერი ცხიმების, ტკბილი სასმელებისა და ალკოჰოლის მიღებას. იკვებეთ რეგულარულად დღეში სამჯერ და ეცადეთ, მინიმუმამდე დაიყვანოთ წახემსებათა რიცხვი. შეგიძლიათ მცირე რაოდენობის ჭარბცხიმიანი და მაღალკალორიული საკვების მიღებაც, თუმცა იშვიათად.
  • მოერიდეთ ე.წ. საკვებ მახეებს ანუ მდგომარეობებს, რა დროსაც ჭამისგან თავს ვერ იკავებთ. მოახდინეთ ისეთი სიტუაციების იდენტიფიცირება, როცა ჭამის სურვილი აჭარბებს თქვენს მაკონტროლებელ შესაძლ ებლობებს. იქონიეთ ჩანაწერების წიგნაკი, სადაც ჩაიწერთ იმ საკვებს, რასაც მიირმევთ, რამდენს მიირთმევთ, როდის მიირთევთ, რას გრძნობთ ამ დროს და რამდენად მშიერი ხართ. რამდენიმე ხნის შემდეგ, გადახედეთ თქვენს ჩანაწერებს და გააკეთეთ ანალიზი. ამ გზით თქვენ უკეთ შეძლებთ საკუთარი თავისა და სიტუაციების კონტროლს.
  • აწარმოეთ წონის რეგულარული კონტროლი. ადამიანები, რომლებიც კვირაში ერთხელ მაინც რეგულარულად ამოწმებენ თავიანთ წონას, უფრო წარმატებით იკლებენ წონაში. წონის ამგვარი პერიოდული კონტროლი საშუალებას გაძლევთ შეაფასოთ თქვენი ძალისხმევის შედეგი.
  • იყავით თანმიმდევრული. დასახეთ თქვენი სამიზნე ჯანსაღი წონის მნიშვნელობა და არ მისცეთ საშუალება არაფერს, ხელი შეგიშალოთ მისკენ სწრაფვაში.
დიაგნოზი

სიმსუქნის დიაგნოზის დასასმელად მოწოდებულია ფიზიკური გამოკვლევები და სპეციალური ტესტები, რომლებიც მოიცავს:

  • ჯანმრთელობის ისტორიის შესახებ ინფორმაციის შეგროვება. ექიმი აგროვებს და აფასებს ინფორმაციას წონის, მისი კლებისთვის მიმართული ღონისძიებების, ფიზიკური აქტივობის და ცხოვრების წესის შესახებ. აგრეთვე ინტერესდება კვებითი ნირით, მადის კონტროლით, ჯანმრთელობის სხვა პრობლემებით, იმ პრეპარატებით, რომლებსაც შეიძლება იღებდეთ და ა.შ. ექიმი ასევე აფასებს ოჯახურ ისტორიასა და სხვა ფაქტორებს, რომლებიც გავლენას ახდენენ დაავადების წინასწარგანწყობაზე.
  • ზოგადი ფიზიკური გამოკვლევა. აღნიშნული მოიცავს სიმაღლის, საციცოცხლო მონაცემების, როგორებიცაა: გულისცემის სიხშირის, არტერიული წნევის, სუნთქვის, ტემპერატურის შეფასებას. გულისა და ფილტვების აუსკულტაციას და მუცლის ხელით გასინჯვას.
  • სხეულის მასის ინდექსი გამოთვლა. ექიმი აფასებს სხეულის მასის ინდექსს (BMI). სხეულის მასის ინდექსი 30 და მეტი მიჩნეულია სიმსუქნედ. რაც უფრო მეტია ინდექსი 30-ზე მით უფრო იზრდება ჯანმრთელობის რისკები.
  • წელის გარშემოწერილობის განსაზღრვა. ცხიმი, რომელიც წელის გარშემოა დაგროვილი, ასევე, ცნობილია, როგორც ვისცერალური ან მუცლის ცხიმი. იგი დაკავშირებულია გულსისხლძარღვთა სისტემის დაავადებებისა და დიაბეტის განვითარებასთან. ქალები, რომელთა წელის გარშემოწერილობა აღემატება 89 სმ-ს და კაცები, რომლეთა წელის გარშემოწერილობა აღემატება 102 სმ-ს, იმყოფებიან ჯანმრთელობის უფრო მაღალი რისკების ქვეშ, ვიდრე წელის უფრო მცირე გარშემოწერილობის მქონე ინდივიდები. ისევე, როგორც სხეულის მასის ინდექსი, წელის გარშემოწერილობაც უნდა განისაზღვროს წელიწადში მინიმუმ ერთხელ.
  • ჯანმრთელობის სხვა პრობლემების შეფასება. ჯანმრთელობის რაიმე სხვა პრობლემის არსებობის შემთხვევაში, ექიმი ატარებს გამოკვლევებს და აფასებს მათ. ხდება არტერიული ჰიპერტენზიის, დიაბეტის, გულის პათოლოგიების შეფასება და ა.შ.
  • სისხლის გამოკვლევა. რომელი კვლევის ჩატარება გახდება საჭირო, ეს დამოკიდებულია ჯანმრთელობის ზოგად მდგომარეობაზე, რისკ ფაქტორებსა და იმ სიმპტომებზე, რომლებიც შესაძლოა, ვლინდებოდეს გამოკვლევის მომენტში. სისხლის გამოკვლევა შეიძლება მოიცავდეს ქოლესტეროლის განსაზღვრას, ღვიძლის, თირკმლისა და ფარისებრი ჯირკვლის ფუნქციურ ტესტებს, გლუკოზის დონის განსაზღვრასა და სხვა.

ყველა ამ ინფორმაციის მეშვეობით, ექიმი საზღვრავს, თუ რა წონის დაკლება უნდა მოხდეს, როგორია არსებული რისკები და ჯანმრთელობის მდგომარეობა. ამ ყველაფერზე დაყრდნობით კი, იღებს მკურნალობის გადაწყვეტილებას.

მკურნალობა

სიმსუქნის მკურნალობის მიზანი ჯანსაღი წონის მიღწევა და მისი შენარჩუნებაა. ამ დროს უმჯობესდება ჯანმრთელობის ზოგადი მდგომარეობა და მცირდება იმ გართულებების რისკები, რომლებიც სიმსუქნეს ახლავს თან.

მკურნალობის საწყისი ეტაპის მიზანია წონის უმნიშვნელო, მთლიანი წონის 5-10%-ის დაკლება. ეს ნიშავს იმას, რომ თუ წონა შეადგენს 91კგ-ს და სიმსუქნე არის სტანდარტული BMI-თან ერთად, უნდა მოხდეს 4.5-9 კილოგრამის დაკლება. წონის კლებას თან ახლავს ჯანმრთელობის ზოგადი მდგომარეობის, უფრო და უფრო, გაუმჯობესება.

წონის კლების პროგრამები მოითხოვს საკვები რაციონის, სიხშირისა და ფიზიკური აქტივობის ცვლილებებს. მკურნალობის ინდივიდუალური მეთოდების შერჩევა დამოკიდებულია სიმსუქნის ხარისხზე, ჯანმრთელობის ზოგად მდგომარეობასა და მკურნალობის სურვილზე.

საკვები რაციონის ცვლილება

სიმსუქნის დაძლევისთვის უმნიშვნელოვანესია კალორიების შეზღუდვა და ჯანსაღი საკვები პროდუქტების გამოყენება. იმის მიუხედავად, რომ შესაძლოა დასაწყისში სწრაფად შეძლოთ წონის დაკლება, გახსოვდეთ, რომ წონის ნელა, სტაბილურად კლება არის ჯანსაღი პროცესი და იძლევა უფრო დადებით ეფექტს ჯანმრთელი წონის შენარჩუნების თვალსაზრისით.

მნიშვნელოვანია წონის კლების ისეთ პროგრამებში მონაწილეობა, რომლებიც ითვალისწინებენ კლების მინიმუმ 6 თვიან და შენარჩუნების, მინიმუმ 1 წლიან პერიოდებს.

არ არსებობს საუკეთესო გზა, არსებობს თქვენთვის შესაფერისი, ინდივიდუალური გზა. საკვები რაციონის ცვლილება მოიცავს:

  • კალორიების შეზღუდვა. წონის კლებისთვის უმნიშვნელოვანესია კალორიების შეზღუდვა. თავდაპირველად ხდება არსებული საკვები რაციონისა და კვებითი ნირის შეფასება, დაანგარიშება იმისა, თუ რამდენ კალორიას იღებთ დღის განმავლობაში ჩვეულებრივ და რამდენს ხარჯავთ. შესაბამისად, განისაზღვრება ბალანსი და კალორიების ის რაოდენობა, რომლის ამოღებაც შესაძლებელია. ისაზღვრება კალორიების ის რაოდენობა, რომელიც უნდა მიიღოთ დღის განმავლობაში. ტიპურად იგი შეადგენს 1200-დან 1500 კალორიამდე ქალებისთვის და 1500-დან 1800 კალორიამდე კაცებისთვის.
  • დანაყრება მცირე რაოდენობის კალორიით. ზოგიერთი საკვები, მაგალითად: დესერტები, ტკბილეული, ცხიმები, გადამუშავებული პროდუქტები მთლიან მასასთან შეფარდებით შეიცავენ დიდი რაოდენობით კალორიებს, განსხვავებით, ხილისა და ბოსტნეულისა, რომელთა დიდი პორციებიც კი ძალიან მცირე რაოდენობით შეიცავს კალორიებს. დაბალკალორიული საკვების დიდი რაოდენობით მიღება იწვევს დანაყრების შეგრძნებას მარტივად, შედეგად კი ნაკლებ კალორიას ღებულობთ. აღნიშნული გეხმარებათ წონის კლებაში.
  • შეაჩერეთ არჩევანი ჯანსაღზე. ჯანსაღი საკვები რაციონის ჩამოყალიბებისთვის მიირთვით უფრო მეტი მცენარეული პროდუქტი, ხილი, ბოსტნეული, მარცვლეული. ცილების კარგი წყაროა პარკოსნები, ლობიო, ბარდა, სიოიო და სხვა. თუ გიყვართ ზღვის პროდუქტები, ჩართეთ საკვებ რაციონში თევზი კვირაში ორჯერ. მიიღეთ მცირე რაოდენობით ცხიმები და ეცადეთ მიიღოთ მცენარეული ცხიმები.
  • ზოგიერთი საკვების აკრძალვა. ზოგიერთი დიეტა ითვალისწინებს გარკვეული საკვების ლიმიტირებას, მაგალითად, ნახშირწყლებით მდიდარი საკვების აკრძალვა, ცხიმებით მდიდარი საკვების აკრძალვა და სხვა. ასეთი გადაწყვეტილება ექიმის გარეშე არ უნდა მიიღოთ. რაც შეეხება დესერტებისა და შაქრის შემცველი გაზიანი სასმელების აკრძალვა, წონის კლებისკენ მიმართული პროგრამების განუყოფელი ნაწილია.
ფიზიკური აქტივობა

ფიზიკური აქტივობის გაზრდა წონის კლებისა და სიმსუქნის მკურნალობის კრიტიკულად მნიშვნელოვანი ელემენტია. იმ ადამიანთა უმრავლესობა, რომელიც დაკლებულ წონას ინარჩუნებს ხანგრძლივად, წელიწადზე მეტ ხანს, მიმართავს რეგულარულ ფიზიკურ აქტივობას, თუნდაც სიარულის სახით.

იმისათვის რომ გაზარდოთ ფიზიკური აქტივობის დონე, მნიშვნელოვანია:

  • ვარჯიში. სიმსუქნის მქონე პირებისთვის მნიშვნელოვანია, რომ კვირაში, მინიმუმ, 150 წუთის განმავლობაში დაკავდნენ საშუალო ინტენსივობის ფიზიკური აქტივობით. ამით ხდება წონაში შემდგომი მატების პრევენცია და დაკლებული წონის სტაბილიზაცია. მეტი შედეგის მისაღწევად საჭიროა დატვირთვის დრო გაიზარდოს კვირაში, მინიმუმ, 300 წუთამდე. მნიშვნელოვანია, რომ ფიზიკური აქტივობის დრო გაიზარდოს თანდათანობით, შესაძლებლობების გათვალისწინებით.
  • განაგრძეთ მოძრაობა. და მაინც, თუმცა აერობული ვარჯიშები კალორიების წვისა და წონაში კლების საუკეთესო საშუალებაა, ექტრა-ფიზიკური აქტივობები კიდევ უფრო დაგეხმარებათ საუკეთესო შედეგის მიღწევაში. შეცვალეთ მცირე დეტალები ყოვედღიურობაში და დაამატეთ სასარგებლო ჩვევები. თუ მანქანით გადაადგილდებით, სამიზნე ობიექტის მოშორებით გააჩერეთ მანქანა და დარჩენილი მანძილი გაიარეთ ფეხით, თუ საზოგადოებრივი ტრანსპორტით მგზავრობთ, ჩამოდით 1-2 გაჩერებით მოშორებით და იარეთ ფეხით. ატარეთ პედომეტრი, რომელიც ითვლის თქვენი ნაბიჯების რაოდენობას. 10000 ნაბიჯი დღეში ნამდვილად კარგი შედეგია. თანდათანობით გაზარდეთ ნაბიჯების რაოდენობა.